Si Palui : Basadakah Duit Ganal

KARNA basungsung tulakan maka bubuhan Palui kawa masuk ka dalam masigit dan duduk di syaf panangahan. Imbah mandangarakan khutbah, sembayang Jumahat, lalu ba-amin dan urang bubaran, Palui tatap haja duduk taungut di atas sajadahnya.

“Mak, uiii... Mak, gawil si Palui, bawai bulikan,” ujar Garbus manyuruh Tulamak.

“Aku kada wani manggawil, pinanya inya khusu banar sambil tangannya mangatik tasbih,” ujar Tulamak.

“Mungkin inya masih mahafal amalannya,” ujar Garbus.

“Ikam haja Bus ai mangiyaunya. Sudah parak baparampat jam kita mahadangi balum jua tuntung, parut sudah galurukan,” ujar Tulamak. Garbus bawani mamaraki sambil maitihi muha Palui nang muntungnya kakarimut sambil baucap.. mudahan, mudahaann...

“Lui, uiii... Lui, lakasi kita bulikan, hari sudah landung, napa tadi kudangar ikam pina gagarunum baucap... mudahan, mudahaann...,” ujar Garbus.

“Hah, haahh...,” ujar Palui takajut digamit Garbus.

“Anu Bus ai, aku badoa banar,” ujar Palui sambil kurikih ka kantung.

“Badoa mudahan napa, mudahan lakas dapat binikah?” ujar Garbus maanyaki batakun.

“Aku badoa mudahan duitku lambaran saratus ribu kawa tabulik pulang,” ujar Palui pina sadih.

“Hilang di mana duit ikam lambaran saratus ribu itu, maka maharap dan badoa supaya tabulik pulang?” ujar Garbus.

“Anu... anuuu... aku tasalah juhut Bus ai. Duitku di kantung ada salambar ratusan ribu dan babarapa lambar ratusan rupiah, balangnya sama-sama habang.

Lalu wayah handak masuk masigit tadi aku talihat celengan, karna aku handak manyumbang maka langsung kujuhut lambaran habang itu lalu kumasukakan kacelengan. Eee... sakalinya aku tajuhut lambaran ratusan ribu itu. Kawalah diambil Bus? Makanya tadi aku badoa, mudahan tabulik, mudahan tabulik,” ujar Palui pina sadih.

“Ihlasakan haja Lui ai. Itu tandanya ikam basadakah di hari baik, hari Jumahat, banyak pahalanya,” ujar Garbus wan Tulamak mahibur Palui. (ivd/tam)

Sumber : Banjarmasin Post Jumat, 11 Mei 2012