Si Palui : Hayam Sabalah

BAISUKAN itu wayah Palui wan Garbus handak tulakan ka pasar, bakakajutan acil Irus mangiyau, manyuruhakan basinggah.

“Bus... ui Garbus, ini nah ada apam hanyar datang,” ujar acil Irus mangiyau.

“Masih panaslah apamnya?” ujar Garbus.

“Kalu nang ngarannya apam Bus ai, biarpun lawas rasanya hangat jua,” ujar Palui umpat manyahut.

“Apam nang mana Lui?” ujar Garbus.

“Apam acil itu pang,” ujar Palui.

“Jangan manyindir Lui, ikam itu wani manyambat haja imbah kusadiakan kada kakayanya,” sahut acil Irus marasa disindir Palui.

“Aku bagaya haja cil ai, sahibar manyambat,” ujar Palui.“Ayu Lui lakasi duduk nginumankah, makanankah, kaina aku nang mambayarinya,” ujar Garbus.

“Aku nginum haja Bus ai, karna aku sudah bajanji wan biniku bahwa aku makan di rumah haja,” ujar Palui.

“Palui ini urang satia wan bini kada hakum makan di luar, pasti iwaknya nyaman-nyaman,” ujar acil mambalas manyindir.

“Kalu sual makanan atawa sual iwak di rumah, aku kada bapilih Bus ai, pukuknya nyaman tarus,” sahut Palui.

“Kada usah ba-agak, kada usah sumbung Lui ai sual iwak,” ujar Garbus.

“Napa iwaknya Lui?” ujar acil Irus.

“Aku kada cakah dan kada sumbung cil ai. Cuntuhnya, samalam sabalah nukar hayam,” ujar Palui.

“Dasar nyaman pamakan ikam Lui ai, kalu sampai sabalahan manukar hayam,” ujar Garbus mamuji.

“Saban harilah kaya itu Lui?” ujar acil Irus.

“Alhamdulillah, samalamnya sabalah pulang,” ujar Palui.

“Razaki manusia kada sama, ikam Lui ai tamasuk urang bauntung, saban hari manukar hayam sabalah-sabalah,” ujar Garbus.

“Kaya itu jua Bus ai, baisukan tadi sabalah pulang nukar hayam,” ujar Palui.

“Kalu kaya itu pantas haja Palui kada hakun lagi makan di warungku. Aku manyasal Lui ai kanapa maka dahulu aku kada hakun dijuduhakan wan ikam. Sakalinya hidup ikam nyaman banar hari-hari makan hayam tarus,” ujar acil Irus.

“Sual hayam ini cil ai, aku nang paling katuju mancium bau sambal dan bau bumbu-bumbu kuahnya haja cil ai,” ujar Palui.

“Hau kanapa maka ikam cuma katuju mancium bumbu-bumbunya haja?” ujar acil Irus.

“Itulah ... samalam sabalah nukar hayam, samalamnya sabalah pulang manukar hayam dan baisukan tadi sabalah pulang nukar hayam. Aku cuma mancium bau bumbu sambalnya haja, kada tamakan daging hayamnya,” ujar Palui.

“Kanapa maka kada tamakan dagingnya Lui?” ujar Garbus.

“Samalam urang sabalah kanan rumahku nang manukar hayam, samalamnya tatangga nang sabalah kiwa manukar dan baisukan tadi urang sabalahnya lagi. Artinya, urang sabalah-manyabalah rumah nang manukar hayam, kada biniku. Makanya kami hanya kabagian kaciuman bau bumbu-bumbunya haja,” ujar Palui mambuka rahasia. (ivd/mht)

Sumber : Banjarmasin Post Kamis, 10 Mei 2012