si palui : Haraga Mati

NANG ngaran kadada gawian tatap Palui tu rajin bajualan ka kampungkampung. Istilahnya manyasah pasar. Saban baisukan sampai suri inya rajin bakuliling mambawa barang dagangan.

Amun malam,  rahat turun wan duduk di warung manamui kakawalan inya rajin jua mambawa barang dagangan. Jadi, tumat baisukan sampai ka malam inya bajualan, rahat guring haja inya kada bajualan.

Haraga Mati

“Siapa nang handak nukar jam tangan. Ikam kah Bus, Mak atawa ikam Tuhirang? Murah haja nah, barang luar,” ujar Palui manawari kakawalannya rahat di warung.

Tunggal ikungan kakawalannya tu disurungi Palui jam tangan. Imbah itu masing-masingnya maniring jam tangan nang disurung Palui. Tulamak sakalinya lawas banar handak bajam tangan. Pina katuju banar inya malihat jam tangan nang disurung Palui.

“Barapa haraganya Lui? Dapatlah lima puluh ribu?,” ujar Tulamak.

“Amun Lima puluh ribu tu hanyar batrainya haja Mak ai. Haraganya aku bajual saratus lima puluh ribu,” ujar Palui sambil mamadahakan kaharatan jam tangan nang ujarnya ulahan Jarman tu.

Mandangar saratus lima puluh ribu, Garbus nang asalnya pina handak manukar jua langsung malapas wan maandak jam tangan jualan Palui.

“Kalalarangan Lui ai,” ujar Garbus sambil maandak. Tulamak nang kahahandakan bajam tangan tatap maniring jam nang dipingkutinya. Satumat-tumat mamuruk jam  tu ka tangan.

“Kaya ini haja nah, daripada kita bahual bahimat batatawaran haraganya, sambat haja ikam Lui ai barapa haraga matinya. Nyaman aku kada manawar lagi,” ujar Tulamak.

“Ayuha, nang ngaran kawal matan halus kupadahakan haja haraga matinya. Amun ikam handak, haraga matinya saratus ribu, kada kurang lagi,” ujar Palui.

“Nah iya tu nang kaya itu. Kakawalan jua handak diwalanda-i. Aku nukar nang ini. Haraga mati kalu sudah saitu tu,” ujar Tulamak sambil maambil duit di puntalan tapih lalu mambayari ka Palui. Imbah baakad, Tulamak manyurung tangan kiwanya ka Palui. “Pasangakan pang. Nang manukar tu adalah raja Lui ai, makanya ikam harus mamasangakan ka tanganku,” ujar Tulamak manggawi Palui.

Imbah dipasangakan, Tulamak baagak banar. Mahirup kupi pakai tangan kiwa, maisap ruku pakai tangan kiwa, mangurik hidung gin pakai tangan kiwa. Kada tapakai lagi tangan kanannya. Kada lawas, timbul hinip saurangan Tulamak. Muhanya kalas. Parak banar biji matanya manjanaki jam di tangan kiwanya ngitu.

“Hau, Lui? Kanapa jamnya kada bagarak lalu. Ikam mambunguli aku kah?” ujar Tulamak racap tatakunan.

“Kadada mambunguli wal ai. Ikam tadi batakun haraga mati kalu? Saratus  ribu tu pang haraga matinya. Amunnya haraga hidup ikam manambah lima puluh ribu lagi gasan manukar batrainya. Ini ada aku bajual,” ujar Palui manampaiakan batrai. Birai muha Tulamak, Garbus wan Tuhirang mangalangkang tatawa.

“Bah, dasar walanda. Dibungulinya aku. Maka sudah baakad,” ujar Tulamak sambil manapak ka dahi pakai tangan kiwa. (ofy)
Sumber : Banjarmasin Post, Minggu, 15 April 2012